有工作的人有福了

我非常之相信一個現代的女性係絕對需要有一份工作，就算是結了婚的媽咪也可以出來工作，那家庭的收入也寬鬆些同穩定些。而且我自己一直都唔係可以只留在屋企湊仔的人，而且呢４年來嘅工作一直都是我最喜愛的工作，所以我堅持地飛咗４年，現在要離開真的是好唔捨得。

但是我現在正為新的工作而煩惱。來到荷蘭最重要的是要學荷蘭文。回想自己用了２０多年時間學英文，也不是perfect。現在２６歲的我才開始學一樣新的語言，而且文法又和英文很不相同，你可想到我有多麼的煩惱 ！

因自己一直的學歷都在香港，又不甚喜歡office的刻板工作，而且畢業後差不多第一份工已是做cabin crew，所以除了飛之外，我也唔知可以做些甚麼。其實我都算好彩，在６月份的時候荷蘭公司已請了我做地勤。這也是我除了飛之外喜愛嘅工作，因為我熟悉運作，而且又可以有平機票返香港。但是等出工作證等了近４個月也還未有消息，真是令我心急。幸好昨晚和我上司通了電話，她說今天會替我跟進，希望好快會有好消息啦！那麽我又可再次着上籃色的制服做“藍精靈”了。

現在仍在放假中，雖然生活仍是非常忙碌，每天仍要返學、湊希希，但是喜愛工作的我仍然其待我的開工日子！

我的管家—希希

不經不覺我的希希已經２０個月大了。我常常都同我老公講我生希希的事感覺只是過了３個月。現在仍然很清楚記得第一眼見他的樣子。或者這些都是所有做媽咪嘅通病，我媽咪在我離開香港時寫給我的信中也提到佢見到我的感覺。真的是要到了做人父母時才知道父母一直對自己的無微不至，以及無限的付出與包容。

希希是一個頗聰明嘅小朋友，或者你會話我係佢媽咪，所以一定會覺得佢係呢個世界上最好的小朋友。那真要請你包容一下，我相信絕大部份嘅父母都係同我一樣，就算口中話衰仔，但係心入面係至寶。 希希嘅聰明完全係因為佢觀察力很強，唔好睇佢年紀細細，你做每一樣嘢佢都好留心睇，所以大部份嘢你做一次佢就明白。佢因此亦有一個外號“希管家”，佢喺屋企入面每一樣嘢都要依佢嘅指示去做。例如我哋去完洗手間之後佢一定要我哋關燈、鎖門，你沖完涼之後又遞毛巾俾你。最近開始連去街都有傾向管埋其他人啲嘢，有時你見到一個只不過未夠兩歲嘅小朋友做呢啲嘢真係俾佢搞到你都唔知好笑定激死！

喺我仲飛緊呢一年多，好感謝我奶奶幫我湊希希，否則我一定會放棄我嘅工作和理想。而且有一半時間﹝其實係大部份時間﹞喺嫲嫲度的而且確分擔了唔少我嘅工作。喺呢度再一次多謝我嘅奶奶。人哋成日都話婆媳關係好難相處，我相信佢真係呢個世界上最好嘅奶奶。

希望希希能如其名，懷着希望，健健康康繼續帶給我哋更多的歡樂和回憶。

心心結婚了！

昨天收到好朋友心心的email，說到她和男朋友馬仔決定 了分開註冊和擺酒的日子。一來可以早些申請警察宿舍，二來可以輕鬆些，不用將所有事放在一個月之內完成，真是替她們開心。

心心其實係我兩個最好朋友之中其中一個，她亦係希希其中之一位契媽。我同心心係小學已經一齊喺真光讀書，但一直只知有其人而未係朋友。直至高中，由於大家都是選讀文科，機緣巧合之間大家一拍即合。回想起來真的很感謝佢一直以來對我的支持和鼓勵。我哋喺近呢４至５年見面嘅時間真的很少，甚至每次約會都未必成功見面（註：心心為一位非常忙碌而負責嘅社工）。但係每次見面我哋都總係有說不完的話題。好朋友不用多，也不需經常見面，只要大家嘅心入面有對方就足夠了。

猶記得心心同馬仔相識的經過，不經不覺已經9年了。其中他們也經歷了許多事。很開心佢哋一直都很珍惜對方，而且現在開始踏上新的階段，祝佢哋永遠都幸福快樂！

新的開始

再睇番上一次的message, 已經是三個月前的事. 一直沒有再update嘅原因係因為喺呢三個月一直為我將要真正移民到荷蘭而忙碌. 雖然喺呢四年嚟已經熟悉咗呢嗰地方, 我哋已經有自己的家. 但係在四日前當我坐喺我非常熟悉的飛機時, 我真係非常之唔捨得呢一個我成長嘅地方. 呢度有我嘅父母、家人、朋友、以及我所有的回憶. 最唔捨得嘅係我嘅父母, 希望佢哋永遠身體健康、開開心心.

Anyway, 這是一個新的開始.......